عايزه اشخبط  

الأربعاء، 30 ديسمبر، 2009



حاله من اللخبطه والرغبه فى الشخبطه وعدم التركيز واللامبالاه وحتى مش عايزه عارفه ايه

ولما فكرت عملتى ايه فى السنه اللى فاتت ملقتش حاجه ولما فكرت انا عايزه ايه السنه الجايه

برضه ملقتش حاجه هو ايه الحكايه ؟


AddThis Social Bookmark Button


لـــيـــه  

الخميس، 24 ديسمبر، 2009

تجرح قلبي أنا ؟
تقسى عليا أنا ؟
تجرح قلبي أنا ؟
لـــيـــه؟
تقسى عليا أنا ؟
قرب ليا
شوف بعنيا
حتعرف مين أنا

AddThis Social Bookmark Button


تاج من بلاد السحر والخيال  

الخميس، 17 ديسمبر، 2009


تاج من بلاد السحر والخيال


اسمك؟

مى


سنك؟


18


اسم مدونتك؟


حلم كان

مجال دراستك؟


رياض اطفال

هل فكرت في اغلاق مدونتك؟ والسبب؟


لا لانى مش عامله المدونه لسبب معين انا عامله عشان اكتب اللى انا حاسه


يعنى حاجه بحبها حاجه بتضايق منها خبر سمعته علق معايا موقف غريب حصلى


كده يعنى


ايه رد فعلك لو حد قل ادبه عليك في المدونه؟


بمنتها البرود هقوله شكرآ ده من ذوقك

ولو فى تجاوز او الفاظ مش كويسه همسح الرد


أسوا مدونه دخلتها؟


مدونه كانت قليله الادب


هيحصل ايه لايميلك بعد ماتموت؟
اكيد هيموت معايا هيعمل ايه من بعدى يعنى


اديت الباسورد لحد قبل كده؟
تو محدش له ان ياخد الباسورد بتاعى ودى اصلا

لانه يعتبر من اكتر الحاجات اللى تخصنى

وانا مش بحب حد يتدخل فى حاجه خاصه بيا


السفر بالنسبه لك؟
بحبه جدآ غم انى مش بعمله كتير بس الواحد بيتعلم منه كتير

وبيعرف حاجه عمره ماعرفها وبيحس بحاجات فى حياته

هو مش عارف قيمتها

المود بتاعك ايه؟
الوقتى يعنى ولا علطلول


هو الوقتى عادى مش مبسوطه


ولا زعلانه عادى بس بفكر فى حاجه تعبه دماغى


لكن علطول تلافنى بميل للنكد حتى وانا فرحانه



بتعمل ايه وقت فراغك؟
النت ....القراءه ... بذاكر بس ده فى وقت الفراغ اللى قبل الامتحانات علطول


الاكلات المفضله؟
ادمان للمكرونه وخصوصا بالبشاميل . البرنجان . الجمبرى ( ايه التاج الجعان ده )


الصفات التي اخدتها عن والدك؟
العند . محدش يعرف انا بفكر ازاى



الصفات التي اخدتها عن والدتك؟
بحب الورد . مش بكره حد . مش عارفه اجيب نفسى لماما

يعنى ماما احسن بكتير ده كفايه بس انها عنده قدره

على الاستحمال ان نفسى اتعلمها مش عارفه


اكتر 6 حاجات بتحبهم؟
الورد ... المطر ...البحر ... القراءه ...النت .... انا اشارك فى خير


اكتر 6 حاجات بتكرهم؟
الخيانه .. الكدب ....ان حد يضحك فى وشى وهو مش طايقنى ...انى اضحك فى وش حد وانا مش طايقه ... ان حد يتبرد عليا وانا متنرفزه ... البيض


شخصيتك نوعها ايه؟
مش معقده للدرجه الخناقه


ولا فرى خالص يعنى وسط


بتعب اوى لما اجى اخد قرار فى حياتى


طيبه بهبل ودى حاجه مش كويسه ومش بحبها



لماذا دخلت عالم التدوين من الاساس؟




عشان لما ببقا مضايقه بحب اكتب ولما بكون فرحانه برضه بحب اكتب

وعشان ساعات ببقا عايز اتكلم ومفيش بيسمعنى


اهميه التعليقات بالنسبه لك؟
بحس انى مدونتى لها قيمه


وان فى حد بيشوف انا بكتب ايه


وفى حد بيشوف رايى


وبيخلنى اكتب اكتر


واحب المدونه اكتر


احلي بوست كتبته مع ذكر السبب؟
يارب قلبى ميكنش منقط لانى فضلت افكر فى الموضوع ده كتير

مع خالص احتقارى لانى كنت هموت ساعتها لو متكلمتش ولقيت المدونه افضل مكان اتكلم فيه


افضل مدونه قريتها؟

كتير مينفعش اقول مدونه واحده عشان مبقاش كدابه



اهميه الانترنت بالنسبالك؟
معرفش اعد من غيره

هو المخرج الوحيد ليا

يعنى لو فاصل بحس ان انا كمان فاصله


اهداء التاج؟



الشاعر الحزين\ قلمى العزيز \
7akwena \ ابتسامه حزن


شكرآ ليك يامحمد على التاج

وان شاء الله هدبسك فى واحد قريب

AddThis Social Bookmark Button


اتعلم عليا واتخبط على دماغى  

الأحد، 13 ديسمبر، 2009





سالخير عليكم

ازيك يامدونتى
وحشتنى اوى

ازيكم يامدونين
انتو كمان وحشتونى كلكم

بعتذر عن غيابى بس ده

والله غصب عنى ده عشان
المد ترم وعمايله

الحمد انا حليت كويس

والامتحان اللى مش حليت

فيه كويس اتلغى

ومحدش فى الدفعه كلها هياخد

درجته كاسلوب من اساليب العقاب

بس والله الواحد مبسوط هيجب الزيرو

بكرامه شويه احسن ماكان يجيبه من غيرها
بقالى اسبوعين عامله اذاكر لما
ذى ماكون مخبوطه على دماغى


وفوق كل ده اتعلم عليا



عاااااااااااااااااااااااااااااا
موبيلى اتسرق
عااااااااااااااااااااااااااااا
ومنين ؟ من شنطتى

عاااااااااااااااااااااااااااا

وكمان من غير ماحس

عاااااااااااااااااااااااااااااا

اخر بصه ليا فى الموبيل

وانا داخله الموقف

وحطيته اخر حطه فى الشنطه
وكان الموقف زحمه طحن

واول ماركبت بطلع الموبيل مش لقيته

عااااااااااااااااااااااااااااااااا

قولت للبنت اللى كانت قدامى

ترن عليا البنت مكنش معاها

رصيد بس عملت معايا حركه مجدعه
واستلفت ال 3 جنيه ورنت عليا

لقيته مغلق

زمان البنت دى بعد ماحولت رصيد

وجالها رساله تم خصم ال 3 جنيه
فضلت تتدعى عليا

انا عارفه
المشكله بقا ان محستش مش عارفه
وطول السكه وانا مروحه عامله اقول

يارب اللى اللى سرق موبيلى موبيله وموبيل ابوه

وموبيل مامته وموبيل اخته لو عنده
وموبيل اخو لو عنده اخ وموبيل جوز اخته

لو اخته متجوزه وموبيل مرات اخوه لو اخوه

متجوز ينفجر مش يتسرق بس


بس رجعت زعلت تانى مش عشان دعيت عليه

عشان نسيت ادعى على موبيل مراته

روحت لقيت ماما بتقولى موبيلك برن مقفول
فصل شحن

قولتلها لا ياماما اتسرق بس

وبعد مباحثات اكتشفت انى فى واحده صحبتى كانت فى نفس
وفى واحد خبطها على دماغها وشد الموبيل من ادها وجرى

ومحدش لحقه واللى كانت واقفه معاها طلعت لها مياه من الشنطه

واتلبخت فيها ومقفلتش الازازه كويس راحت المياه جت على الموبيل

فباظ (ههههههههههههههههههههههههههههههههههههههه)


فهى كانت مافيا فى اليوم ده

المشكله ان الموبيل مكملش معايا 3 ايام
واتسرق

والقديم اللى لسه بياعه فضل معايا 3 سنين

من غير اصابات

فالحاجه اللى طلعت بيها من الموضوع ده كله

ان اللى يفرط فى موبيله اكنه فرط فى مناخيره

فنداء اللى كل من كان معايا رقمه يبعت الرقم فى رساله

او يكلمنى يعزنى على نفس رقمى انا رجعته

مش عايزه شماته كفايه اوى على الايميل قامو بالواجب

انا لسه عندى امتحانات ادعولى بقا


AddThis Social Bookmark Button


شكلها كده لحمه  

الأربعاء، 2 ديسمبر، 2009




هحكى ليكم حكايه قهوه مصريه



وهسالكم فى اخر الحكايه دى سوال



كان ياماكان



كان فى قهوه على ناصيه شارع



وكانت القهوه مخليه منظر الشارع



وحش اوى عشان مكنتش قهوه مصريه



من بتوع الناس المصرين الجد



مش قهوه اى واحد ينزل يقابل اصحابه



عليها كانت فقط للمشوبهين



عارفين ليه ياشاطرين ؟



عشان كانت بتبيع حاجات عيب



ايوه بالظبط بتبيع مخدرات بلاش



مخدرات ماشيها بانجو وحشيش



القهوه دى كان بيدخلها الناس



الى معاهم فلوس اوى والناس



الى مش معاهم فلوس اوى



بيدخلو بيعملو شوبنج



منهم بيدخولها بسبب ان ماما وبابا



من كتر دلعهم فيه بق عيل فاسد



ومنهم اللى بيروح عشان ملقاش



ماما وبابا يقول ان ده حرام وده عيب



تلاقى المنظر من دول نازل بيعمل شوبنج



وتلاقى واحد مش لاقى ياكل برضه نازل



يبضع مع ان ممكن يبقا مفيش فى جيبه نص



جنيه ولا فى بيته لقمه عيش بس نازل



برضه يشترى



المهم ان الشرطه عارفه ان كل ده بيحصل



فى القهوه وعامله نفسها مش واخده بالها



ولما الموضوع بقا اوفر قالو عاملنها مصيده



للناس



طب ماقبض على الكبير ميشتريش الصغير



المشكله بقا مش فده كله




الحاجات دى بقت عادى



المشكله ان القهوه دى عليها ضغط اليومين دول



فوق الفظيع



والله العظيم والله العظيم والله العظيم



بالطابور اه والله بالطابور



وتلاقى حوالين القهوه ناس كتير كده ذى مايكون



فى خناقه



لا وايه ياريت اصحاب القهوه حمدين ربنا



ده بيعملو اعلان لكل شخص داخل



المنطقه يمكن ابليس يلعب فى دماغه ويروح يعمل شوبنج



هو كمان



انا بقا عايزه اعرف ايه سر زياده العدد اليومين دول



هى القهوه بتوزع لحمه ولابتبيع بانجو ؟؟؟؟؟



AddThis Social Bookmark Button


هو بكره العيد ؟؟؟  

الخميس، 26 نوفمبر، 2009




هو بكره العيد ؟؟

السوال ده كان ليا من سواق التوك توك النهارده وانا رجعه البيت

فقولت بينى وبين نفسى هو الرجل دهبيستهبل ولا ايه ده كبير يعنى
مش شباب هنقول بيستخف بدمه قولتله اه كل سنه وانت طيب ياعمو

قالى امال القذافى عامله النهارده ليه قولتله والله ماعارفه شكل

العيد هو جاى وصل عندهم الاول وبعيدن جه عندنا مانت عارف الموصلات بقا

عمو السواق ضحك وقال والله يابنتى الدنيا دى غريبه

بس انا برضه بسال هو العيد عند القذافى النهارده ليه ؟


كل سنه وانتم طيبين يارب

وان شاء الله عيد سعيد علينا كلنا

اينعم انا لسه مش حاسه ان بكره العيد

بس ممكن احس بكره

اينعم الجاموسه جيت تحت اهى ونزلت اتصورت معاها صوره للذكرى

بس مش حاسه برضه ان بكره العيد

اينعم اخدت 20جنيه اول عديه

بس لتالت مره مش حاسه ان بكره العيد


ان شاء الله هحس بكره

ههههههههههههههههههه

كل سنه وانتو بخير يلا

كل سنه مدون ومدونه بخير

كل سنه والناس كويسين وطيبين يارب

كل سنه وكل مسلم كويس

كل سنه والاسلام عالى فووووووق

فوق اى حد

ياااااااارب

ملحوظه هامه \ محدش يسيب كومنت من غير عديه
واللى مش هسيب كومنت برضه يسيب عديه
محدش يدخل يقولى ده عيد اللحمه ومفيش عديه
بصو من الاخر هتسيبو يعنى هتسيبو
بس

AddThis Social Bookmark Button


منتهى الغيظ  

الأحد، 22 نوفمبر، 2009

بكون فى منتهى غيظى
لما اسال حد على طريق مكان معين

ويكون اجابته هما قالولك فين ؟

مهما لو قالولى مكنتش سالت

وبعدين هما مين اصلا ؟

AddThis Social Bookmark Button


yes we can  

الأربعاء، 18 نوفمبر، 2009

yes we can
بس مفيش نصيب
انا زعلانه اوى
بس دى اراده ربنا
مبسوطه بالمنتخب
تعب وعمل اللى عليه
بس انا برضه زعلانه

AddThis Social Bookmark Button


شكرآ سياده المفتى  

الأحد، 8 نوفمبر، 2009


سالخير عليكم


ازيكم ياخونا عاملين ايه


بعيد ان جايه اطلع لسانى متر ونص لكل مدون ومدونه محضرش اللقاء


واقول لكل حد حضر بجد كنت فرحانه بوجودى معاكم كلكم


وبجد كان يوم جامد جدددددددددددددددآ ياريت يتكرار


جاى اقولكم على حدث حصل المفروض انه مهم


فانه فى يوم \ 8 -11 -2009


الموافق \اول امبارح


الزمان \ الساعه 12


المكان \ بكليه التربيه جامعه المنصوره تحديدآ مدرج خير الله


الحدث \ كان هناك سياده مفتى الديار المصريه كان فى المنصوره فى ندواه دنيه


اللى حصل بقا ايه ؟



اقولك انا بس الكلام ده مش على لسانى الكلام ده على لسان سياده المفتى

وانا كنت بكتب اللى بيقوله كانى كنت فى محاضره



ام هند بدات الندوه بعد الترحيب والسلامات كان بدايه الحوار عن التعليم

وان كل واحد بياخد على ا دمابيدى وان مقوله فالطح تنجع غلط وفال كمان

اللى بيقول من سهر الليالى بات للعام التالى ولا يبالى ده غلط



بعد حاجه جيت فقره الاسئله وقبل اى سوال قال العميد للمفتى انه يتكلم عن النقاب

والصراحه انا زى اى حد كان موجود كنت مستنه الكلام عن النقاب

كلام المفتى عن النقاب هو اللى جاى ده بالظبط



النقاب اخد اكبر من حجمه فهو ليس واجب وعند مالك كده برضه وان الامام مالك قال انه

عاده فقط وفالنقاب من قبيل المسائل وليس القضايا التى تشغل هذه المساحه من الجدل فان

النقاب اذا اعتبرنه حريه شخصيه فهناك حريه للجهات الاسلاميه فى الاسلاموهناك زى للمسلمات

وبعدين لكل عمل شروط يمكن يكون خلع النقاب واحده منها فهنا يجب احترامها فالحريه لها حدود

وحدها عند الشرط ال condation ياخونا

وان شكسبير مره انا عارف ان فى ناس كتير مش هيعجبها الكلام عشان مش بقول قال الله وقال الرسول

شكسبير مره كان قاعد وفى واحد جمبه حط صبعه فى مناخير شكسبير وقاله انا حر انا احط فى اى حته انا عايزها

فرد شكسبير وقاله حريتك تقف عتد طرف انفى فمن ناحيه هل يجوز للمستشفى ان تمنع النقاب للشوط العمل داخله؟

الاجابه نعم فالحريه تنتهى عند طرف انفى تروح تلبس النقاب قى الشارع وتخلعه فى المهنه وتلبسه وهى مروحه

فى مكان فيه شروط عمل تخلعه

متجيش بقا المنقبه تقولى انت ملكش حق تتداخل فى حريتى فده مينفعش فى المدارس والمستشفيات فالعصب فى هذه

القضيه والشرع لم يلزمها بهذا

فقال رسول الله :"يا أسماء ،إن المرأة إذا بلغت سن المحيض لم يصلُحْ أنْ يُرى منها إلا هذا وهذا وأشار إلى وجهه وكفيه"

هما بيقول ان الحديث ده ضعيف من قال هذا حديث ضعيف من الذى ضغفه طب انا بقا وابوداود بنصحح المعلومه دى

فين الحديث اللى بيقول ان المراه لو كشفت وجه تبقا فى النار الامام مالك بيقول ان النساء اتعودو على كده النقاب ثوب شهره

ونهى الرسول عن الرسول عن ثوب الشهره

فالرسول كان يلبس البياض يعنى اللون الابيض وفى عصر ابن تميه اتخذو جماعه من الفاسدين الون الابيض ملابس لهم

حتى سار شعار لهم وهنا قالو يحرم لبس البياض

حتى ثوب الرجل اتغير والعادات اتغيرت فارجوا ان تاخذ هذا كمساله وليست ككقضيه و ان نلتزم بشوط المكان وبلاش الجدل

السخيف ده فهو عاده وليس عباده فلو المنقبه ظنت انها افضل من التى كشفت وجها فهذا كبر والكبر حرام احنا هنفضل معجن

فى المعجون ونخبز فى المخبوز

ياجماعه العاقل خصيم نفسه والحكيم خصيم نفسه



الصراحه انا قمت راحه امشى لقيت ناس كانت ماشيه والامن والاتحاد قفل الابواب عشان محدذ يخرج عشان خاطر المظر العام

بس بعدها بخمس دقايق قدرت اخرج مع واحده من الاتحاد مهى كوسه بقا ( فيس بيطلع لسانه ) وخرجت فعلآ سياده المفتى بيتريق

وبيضحك واحده يتسال ان كان لبس البنطلون على حاجه طويله حرام ولا حلال ؟



اما تعليقى على الكلام

فانا دمى محروق ومن كتر الكلام مبقاش عندى حاجه تتقال

اينعم انا مش منقبه بس اتمنى اكون منقبه

والعجين والخبيز ياسياده المفتى لما يكون غلط

نبقا لازام نعجن ونخبز من تانى



AddThis Social Bookmark Button


جانا البيان التالى  

الاثنين، 2 نوفمبر، 2009

اخيرآ الحمد لله هيكون فى لقاء فى المنصوره

يااااه كنت مستنيه اليوم ده والله العظيم للدرجه انى

كنت لسه بفكر فيه ودخلت لقيت فى لقاء ياسبحان الله

بقيت بفكر فى حاجات تحصل بقالى كام يوم لو حد عايز

بتجوز يقولى وانا افكر له فى الموضوع بس التفكير ب10 جنيه

ام هند

ان شاء الله يوم الجمعه هيكون فى لقاء فى المنصوره

اللقاء هيكون الجمعه الساعه عشره قدام مستشفى الاطفال

اللقاء هيكون فيه تبرع بالدم يعنى 2 فى 1 شامبو وبلسم

يوووووه اقصد لقاء وخير مش مش لقاء بس ده لقاء وثواب

يعنى هيكون لقاء وتعارف وتبرع وخير وصلاه جمعه وهنقضى

يوم فى نادى النيل وكمان فى الموضوع فيها كوك دور
وده المهم طبعآ بس ياخساره اللقاءده هيبوظ اخلاقنا على

البغل والحجاز والهوت مكس يلا عليه العوض بس هنشوف

ناس كتير ومدونين كتير الواحد بيتمنا انه يشوفهم وان شا ء الله

انا هكون هناك بدرى للاسف هتخل عن هويتى اللى هى التاخير

عن المواعيد بس ده معاد المدونين مش اى معاد يعنى واكيد كلمه
السر ذى الكل عارف كتكوت ان شاء الله هتلاقونى بصوصوهناك من 10

فى حاجه المدونين كلها بيتكلمو عنها وهى التاكسى

التاكسى ياعم ب اتنين جنيه ( تو بوند )

بتاع التاكسى ممكن يستعبط ويطلب 3 جنيه امتا بقا

لما تكونوا اربعه او تكونو 3 او لما يعد يلف بيك شويه

واو تكون جاى من بره المنصوره من الطريق يعنى

وفى الحاله دى للسائق حق الاستعباط

ياريت يكون مدونين كتير موجودين

وان شا الله هيكون يوم جامد موت

التفاصيل هنا

صبرنى يارب

بنت خيخه واى كلام

مسدس صغير



اللى هيحضر ان شاء الله

روح قلب ماما

ستيتة حسب الله الحمش

فشكول

فك زنقه

بنت قلبى

قوس قزح

شاب فقرى

كانى اتكلم

الشعب لابد له من حكومة تشكمه
مواطن شووجااع

همس الاحباب

بسمة أنور

احمد حسن البنا

soul.oOo.wishper

bos bos

samamasr

AddThis Social Bookmark Button


رجعت الشتويه  

الخميس، 29 أكتوبر، 2009



رجعت الشتوية ضل افتكرني يا حبيبى

الهوى مشاوير وقصص الهوي مثل العصافير

لا تحزن يا حبيبي إذا طارت العصافير وغنية


رجعت الشتويه


وهنمشى تحت المطر


وهنرجع هدمنا كلها ميا


والبرد هيجى


والنور هيقطع


بجد وحشتنى اوى ايام الشتا

AddThis Social Bookmark Button


بصراحه  

الجمعة، 23 أكتوبر، 2009

و ياريتها مره واحده

AddThis Social Bookmark Button


يارب قلبى ميكنش منقط  

الاثنين، 19 أكتوبر، 2009


فى يوم فضلت محتاره وفى دماغى اسئله كتير كان نفسى اى حد يرد عليا
كنت بتمنى اى حد يريحنى ويخلصنى من الحيره اللى انا فيها ولقيتنى فى حوار
مع نفسى
انا : هو احنا ليه بنحزن
نفسى :عشان نفرح
انا : ياسلام هنهرج بقا لتتكلمى كلام مظبوط لاما انام
نفسى : وانا ههرج معاكى ليه مش انتى اللى بتسالى
انا : منتى بتهرجى اهو ازاى بنحزن عشان نفرح فهمنى تجى ازاى دى والاتنين عكس بعض تماما ؟
نفسى : منتى لو محستيش بطعم الحزن مش هتعرفى تحسى بطم الفرح
يعنى بمعنى اصح هيبقا الفرح ملوش لازامه ولا قيمه
انا : طب ياريت الفرح كان يبقا موجود علطول حتى لو محستش بيه بس مكنتش احس بالحزن
ولا كان يكسرنى
نفسى : بتهايقلك كنتى هتتمنى تفرحى ومكنتشى هتعرفى يابنتى الحزن بيعرفك صحبك من عدوك ويفرق بين اللى بيحبك واللى بيكرهك وهيعرفك مين اللى هيقف جمبك
انا : طب لما لو محدش وقف جمبى هبقا كسبت ايه
نفسى : كسبتى انك عرفتى انك خساره فى اللى حواليكى وان مفيش حد يستهالك وانك تدورى على الصاحب اللى بجد وعلى الحبيب اللى بجد
انا : طب ليه الحزن بيتعبنى اوى كده وليه بيكسرنا اوى كده هو الحزن بيعمل فينا ايه ؟
نفسى : بيعمل نقط
انا : انا اساسا غلطانه انى بتكلم معاكى وانتى عامله تسخرى منى
نفسى : والله مابسخر منك دانا نفسك
انا : امال ايه حكايه النقط دى كمان ممكن افهم
نفسى : كل حزن بيروح بيسيب نقطه سودا فى قلبنا فى حزن بيسيب نقط كبيره وفى حزن بيسيب نقط مش بتبان
وفى نقط بتروح وبتختفى وفى نقط بتفضل موجوده وفى ناس بتقدر تتغلب على الحزن وتسامح وبالطريقه دى
قلبها مش بيفضل فيه نقط
انا : وياترى انا انهى حد فيهم
يارب قلبى ميكنش منقط ولا يتنقط بعد كده



AddThis Social Bookmark Button


اول يوم جامعه  

الأربعاء، 14 أكتوبر، 2009



اسفه انى جيت متاخر ومش حكيت عن اول يوم جامعه يوم السبت ذى ماكنت قايله

بس والله النت كان متقحرط ومش عارفه اعمل اى حاجهوغير النت كنت بحاول

اظبط دماغى على النظام الجديدلانى فضلت اول يومين فى الدراسه اجى من الجامعه

انام لتانى يوم ام هند اول يوم فى الجامعه انا كان عند 4 محاضرات من 8 ل4 اليوم

ده من كنت مطابقه فيه مكنتش نايمه لان اليوم اللى قبله كنت صاحيه المغرب وانتو

عارفين ان مش انا لوحدى فى البيت مرحله جديده المهم الساعه جيت 6 ونص قولت

انا واختى نصحى اللى فى البيت كله بقا وانا اقترحت ان نصور فيديو اليوم ده عشان

ميرنا داخله اولى ابتدائى وتكون ذكرى حلوه وفعلآ اخدنا الموبيل وفعلآ كانت واحده

ماسكه الموبيل والتانيه بتصحى وفضلنا نصور لحد مالكل مشى انا بقا لبست بسرعه

وده مش الطبيعى بتاعى منت هنزل الجامعه اول يوم لوحدى لان انتمتى فى جامعه تانيه

وكنت زعلانه اوى بس اللى حصل لقت ناس زميلى كتير بيكلمونى عشان نتقابل

ونروح ووصل العدد ان لقيت ان فى 7 هينزلوا معايا وصلنا وكل واحده راحت على كليتها

المحاضره كانت 8 وانا وصلت 8 وعشره كده والدكتوره جيت على 9 كده طبعآ الكل عارف

اول محاضره بتكون كلام وتعارف وانا راحه اصلا عشان كده شويه وجه بنات الاتحاد

والصراحه كانوا مظبتين المدرج على الاخر غير انهم جابوا الجدول والاهم من كده كانوا

ماشين بيدو لكل حد لبان وشكولاته تانى محاضره جيت وجه الدكتور وهو لسه بيتكلم البوقين

اللى فى الاول جه العميد وفضل برضه يتكلم شويه ومشى بس الصراحه انا كنت شايفه الاتنين

اربعه لانى كنت هموت وانام وبدات بقا اجوع والحاله كانت قافله اوى ام هند الدكتور بدا شغل

بجد عجبتنى الماده اوى هى اسمها صحه الطفل والدكتور ده من كليه طب وفكرنى بقا ايام ماكنت

علمى والحاجات اللى كنت بحب اذكرها دى يلا اهى ايام ام هند الماده بصراحه فرحت لان الماده

معلومات عامه بس بصراحه بعد كده حسيت المواد كلها معلومات عامه وعجبتنى اوى كليتى تانى

يوم كان فى 4 محاضرات بس كان فى محاضرتين مهمين لازام احكى ليكم عنهم اول محاضره

دخلت الدكتوره وقالت ان فى كرنفال بكره ولازام كلنا نحضر عشان نرفع اسم الكليه وشويه الكلام

دول المشكله بقا فى اننا نحضر المشكله اننا نجيب بلونات واحنا رايحين عشان نمسكلها فى الكرنفال

طب بالذمه حد يقولى اروح اقول لابويا ده عايزين بلونات فى الجامعه دانا مقولتهاش وانا حضانه

تانى محاضره بفا دخلت دكتوره بس دخلت دخله جامده شويتن وكانت الصدمه الكبرى بالنسبه ليا

انى عرفت انى كليتى فيها خضور وغياب ام هند الدكتور قالت الكلمتين اللى فى الاول دول وقبل

ماتبدا شغل بجد قالت الكل يكتب فى كشكوله يتوقع ياخد ايه فى الماده انا كتبت كام حاجه كده كنت

عارفهم من ثانوى لان الماده اسمها النمو النفسى وانا كان معايا علم نفس وبعد عشر دقايق لقتها مره

واحده بتقول قومى يام بنى استنى ام بنى تقوم محدش قام انتى اللى فى الاخر برضه ولاالهوا اها انتى

ياللى بتصى ناحيتى فوقفت قولتلها انا قالتلى اه وطلعت ام بنى هى انا الصراحه كنت متوقعه انى اتلخبط

وانا بتكلم او حاجه بس مفيش اى حاجه من دى حصلت وحظها انى كنت جايبه 50 فى علم نفس ودى

مبتحصلش كتير خالص عرفت اجاوب عليها وضفت شويه على كنت كاتبه وعدت
بـــــــــــــس خـــــــــلاص
ايدى وجعتنى

AddThis Social Bookmark Button


بــيــن الـســطور  

الأحد، 11 أكتوبر، 2009



مدونه بــيــن الـســطور دى مدونه انا عاملها جديد

هيكون موجود فيها اى حاجه

انا شفتها وعجبتنى ويكون شخص تانى

اللى عامل الحاجه دى يعنى مش انا اللى عاملها

ذى شعر او قصه او اى موضوع فى مدونه تانيه

وهكتب اسم كاتب الحاجه دى

ولو مدونه او حاجه مكانها معروف اكيد هكتبها

يارب تعجب الناس وتكون الفكره حلوه

ياريت اللى يشوفها يقول رايه بصراحه سواء كان ايجابى او سلبى


مستنيه رايكم

AddThis Social Bookmark Button


اهو جه ياولاد  

السبت، 10 أكتوبر، 2009

هيييييييييييييييييييييييييييييييييييه
النت جه بعد ماكان متقحرط وطلع عينى
والجهاز اتصلح وهعد براحتى النهارده اشوف المدونه عشان وحشانى
وانتو كمان وحشتونى اوى
سلام موقت

AddThis Social Bookmark Button


اقصاقيص  

الخميس، 1 أكتوبر، 2009

اول اقصوصه

عايزه اعلق على البوست اللى فات بالنسبه انى مش بحترم حريه الاخرين ذى ماتقال وان دى حريه شخصيه والمفروض احترمها
اصحح المعلومه واقول انى بحترم الحريه الشخصيه وكل حاجه بس لما بيكون اللى قدامى بيحترمنى وبيتكلم باسلوب كويس لكن لو حد غلط واتكلم عنى او عن دينى بطريقه وحشه سورى يعنى مش محترمش حريته الشحصيه بس لا دانا احط صوابعى فى عينه وتبقا برضه دى حريتى الشخصيه اما بالنسبه للعنوان فده رد فعلى لما قريت الكلام اللى هى قالته ده نقفل الموضوع ونفكنا منه بقا

::::::::::::::::::::::::::::::::::::::::::::::::::::::

تانى اقصوصه

انا كنت راحه اكتب يوميات فقريه والفكره جاتلى لما كنت اعد على الجهاز والنت فصل ومكنتش لقيعه حاجه اعملها قولت هكتب حاجه للمدونه فجيت فى دماغى يوميات فقريه كتبت فيها كتير ةعجبتنى الفكره وسيفت الصفحه وعملت ريسترت للجهاز وبفتح الصفحه لقتها ابيض ياورد
فعرفت انها فقريه فقريه من اولها

::::::::::::::::::::::::::::::::::::::::::::::::::::::::::::::

تالت اقصوصه

الدرسه جيت ووبصراحه انا كنت عايزها تجى بس عايزه الدراسه القديمه بتاعت ثانوى والدروس ومدرسين كل سنه واصحابى الكتير اللى كنت اعرفهم وصحبتى للى هتروح السكن بكره ومش هشوفه غير نص ساعه كل اسبوع بعد ماكنت طول النهار معاها وفى كل الدروس مع بعض مش هكدب واقول انى مش حابه الجامعه وكده بس كنت بحب ايام ثانوى اكتر على الاقل كان معايا اصحاب اعدادى فى ثانوى وفضلز معايا ومعرفتش غيرهم الوقتى كل واحد فينا فى مكان وهنزل من اول يوم يعنى محدش يقولى اللى بينزل من اول يوم دول الفلاحين والعيال والنظام ده انا هنزل برضه بس فى سوال رخم كان اى حد بيشوفنى يسالنى السوال ده انت حضرتى نفسك للجامعه نفسى اعرف يعنى ايه حضرت نفسى جبت اليونى فورم والشنطه واستلمت الكتب واشتريت قلم رصاص بصراحه سوال بيغظنى عشان مش لاقيه له اجابه

::::::::::::::::::::::::::::::::::::::::::::::::::::::::::::::

رابع اقصوصه

بمناسبه الدراسه والمرحله الجديده اللى انا ادخله فمش انا لوحدى اللى هدخل مرحله جديده فى البيت فاهم شخصيه فى البيت البيج بوص بتاعت البيت داخله اوله ابتدائى وتخيل بقا فرحت الواحد وهو داخل المدرسه مش عارفه اوصف الاحساس طول النهار نزله قياسه فى اليونى فورم ولما تلبس اللى يونى فورم فلابد وحتمآ تلبس الشنطه امال لازام يبقا الطقم كله ومصممه انها تروح المدرسه بكره اللى هو الجمعه وانا اقولها وربى هو اسبوع واحد وهتحلفى بغربتك اما اختى التانيه بقا اها التانيه متعدش متعدش محنا كتير كل ماتشوف وشى تقولى انا عايزه اشترى طرحه بنى اقولها لا البسى بيضه عشان الابله بتاعت الالعاب هتطلعك مخالف كانت بتعملها فيا كتير انا عارفها بقول كده كطريقه من طرق الخلع تقولى خلاص انزلى اشترى واحده بيضه وكده طول النهار واحده شغاله تقيس والتانيه ماشيه ورايا عشان الطرحه شغال ينوى فرسال

:::::::::::::::::::::::::::::::::::::::::::::::::::::::::::

خامس اقصوصه

طولت عليكم وجبتلكم صداع ان شاء الله هجيب ليكم صداع تانى يوم السبت هحكى اوى يوم جامحه

AddThis Social Bookmark Button


اتفو عليكى ياشيخه  

الأحد، 27 سبتمبر، 2009

تحديث : شيلت الصوره عشان كانت غلطه منى انى احط صوره لحد ذى دى عندى
من برنامج لماذا
طونى خليفه : متى يمكن أن نرى إيناس الدغيدي ترتدي الحجاب؟
ايناس الدغيدى : يا رب ماتكتبها عليّ
حلم كان : ايه البجاحه وقله الاداب والذوق دى ده ربنا والاسلام والحجاب برى منك ومن امثالك

AddThis Social Bookmark Button


هتوحشنى يارمضان  

الخميس، 17 سبتمبر، 2009


المسحراتى كان ماشى امبارح وبيقول وداع ياشهر الصيام

ياخساره يارمضان هتوحشنى اوى دانت لسه جاى قريب

مفيش من مده قصيره اوى نفس المسحراتى كان بيقول

اهلا ياشهر الصيام هتوحشنى اوى يارمضان وهتوحشنى ايامك

مع السلامه يارمضان هستناك السنه الجايه متتاخرش عليا


AddThis Social Bookmark Button


قطعت الاجازه  

الأربعاء، 9 سبتمبر، 2009

يمكن كنت لسه محتاجه اوى للاجازه لكن المدونه برضه بتشيل عنى


اقر واعتراف انا مى (حلم كان ) انى للاسف الشديد نسيت يو 7 \9 رغم انى فكره التاريخ

وعارفه انه قرب لكن نسيت اليوم اللى كان موافق له وهو يوم عيد ميلاد (ابتسامه حزن )

وعشان كده قرارت انا برضه مى ( حلم كان ) ان اقطع الاجازه وارجع المدونه عشانه واقولها

معلش يابتسامه انتى عارفى دماغى اساسا فاضيه وانا كنت فاكره بس مش عارفه نسيت يومها

ازاى وكل سنه وانتى طيبه من هنا للسنه الجايه وتكونى احسن واحسن السنه الجايه

واى حاجه يكون نفسك فيها تتحقق ويارب يخلى ليكى سلمى حببتش ويقصر ف لسانه شويه

AddThis Social Bookmark Button


اجــــــــــــــــــــــــازه  

الخميس، 3 سبتمبر، 2009


اجازه من التدوين

بسبب مود مش كويس

والرغبه فى البعد عن اى حاجه

والوحده لفتره مش عارفه اد ايه

ادعـــــولـــــى

AddThis Social Bookmark Button


يانونو يانونو  

الجمعة، 28 أغسطس، 2009



سالخير عليكم


عارفه ان الصيام عامل شغل معاكم تمام

والكل زمانه نازل نحل الوقتى فى المصحف

عارفه عارفه بس انا مش بحسد ولابقر خاااالص

ام هند انا جيت عشان اقول دخلت تربيه طفوله او رياض اطفال

هى هى يعنى نفس الكليه يعنى هبقا مس اطفال يانو يانو

اخترت الكليه دى عشان علاقه العض بينى وبين الاطفال

اصلى بحب العيال وكمان انا عيله يعنى هنعد نلعب سوا

تاني حاجه عشان المواد بتاعتها حلوه عجبتنى

تالت حاجه عشان هتنفعنى فى حياتى

رابع حاجه عشان مش عايزه ادخل اداب ولا تجاره ولا
وبينى وبين تربيه اساسى واحد فى الميه

خامس حاجه عشان كليه مش حد يعرفها كتير

سادس حاجه عشان دى اقرب حاجه من مجموعى

وبعدين دانا هظبتهم اللى هيدنى نص جنيه هخليه يخلع ويروح السيبر

واكيد محدش هينسا نصيب المس حببته فى السندوتشات لحسن والمصحف اشرشبهم

دانا هوريهم يااااااااااااااه وحظهم الالوان انى هنزل تدريب من اول سنه

يعنى اخد فرصتى بقا

وبعدين انا عايزه عيال ذى سلمى بنت اختى مع العلم انها عمرها مابتقولى ياخالتو

اقولها اسمى ايه ياسلمى تقولى مى اقولها لا التانى تقولى خالتو باحترام دى الحاله الوحيده
اللى اسمع فيها خالتو
عيال كده افضل اطلع فى روحهم واربيهم اوطى تربيه

كان عندى يوم الاربعاء اللى فات انترفيو فى الحر والصيام واولها زراقه كده معايا

اول مادخلت لقتهم بيقولوا 20 جنيه ورق الكشف الطبى اصطبحنا بيهم

وانا لسه مستنيه الدخول لقيت واحد جاى يقول يامنى يامنى تعالى ومنى دخلت

فقولت هى من اولها كوسه ولا ايه وعشان ربنا مش بيرضا بالكوسه لقتنى من ال 4 بنات اللى دخلو مع منى دى
ليقت دكتوره صغيره هى اللى عامله الانترفيو ده ومعاه دك صغير والعميد قابل المجموعات اللى كانت فى الايام اللى قبلنا

وسبنا للدكتوره الظاهر انه كان قرفان مننا لاما كان متخانق مع مراته قبل مايجى

ام هند الدكتوره دى بقا او مادخلت سالت ع الاسم رغم ان الورق فى ايده وفيه كمان الصوره

قولتلها مى
قالت ورينى ايديك
قولتلها نعم ايدى ؟
قالتلى اها ايدك
قولتلها اوك حطيت الحاجات اللى فى ايدى ع الكرسى وخلتها تشوف ايدى

ساعتها بقا افتكرت ابله ليلى سرنجه لما كانت بتعدى علينا واحنا فى الابتدائى
يوم السبت وتشوف الشعر متسرح ولا لا والمريله ( خد بالك من مريله دى مش يونى فورم ) نظيفه ولا لا
وواكيد الايدين والضوافر طويله ولا ومعاكى منديل ورق ولا هتستعملى الكم والحورات دى

هى : انتى كنتى كاتبه الرغبه انهى ؟
انا : الرغبه 2
هى : كنتى كاتبه ايه قبلها
انا : تربيه عام
هى :الهويات اللى بتحبها ايه ؟
انا : النت والقراءه
هى : يعنى ثقافى
انا : تقربيآ
هى :ايه اخر حدث سمعتى عنه غير انفلرنزا الخنازير والنبى ؟
انا : قولتلها ان ملف التقديم بتاع الشهادات المعادله اللى جايه من بره وصل تمانه من 300 اللى 500
بما انك ياختى تبع التعليم العالى والحقيقه كان بيان عليها انها اول مره تسمع الموضوع ده منى ولها حق مهى ملهاش دعوه بيه
بس الصراحه هى دكتوره عسوله



ام هند قالتى خالص روحى ادفعى المصاريف واختارى الحضانه اللى تحبى يكون تدربيك فيها فيها ورحى الكشف
بعدها روحت الكشف والصراحه ملوش اى لازامه غير ان احنا نمشى فى الحر وبس
واكيد روحت البيت عشطانه اوى ودخلت انام جرى وانا بقول لما صحونى ع المدفع
بس فى مشكله ناس تقولى التعامل مع العيال هيشلك
واللى يقول ياشخيه اجرى حولى
واللى يقول حلوه والصراحه مش عارفه عايزه رايكم ياجدعان

انتى يابت يام احمر انتى الجيبه تطول لحسن اولع فيكى ايوه
اياك تجى بكره كده سمعتى

AddThis Social Bookmark Button


لا تـفـسـد رمـضـانـك  

الثلاثاء، 25 أغسطس، 2009

عجبتنى الحمله دى وعجبنى الصور قولت اجيبها اللى مش شافها يشوفها


































AddThis Social Bookmark Button


انت جيت شهقه يارمضان وحشتنا يابو صيام  

الخميس، 20 أغسطس، 2009




قبل ماقول كل سنه وانتو طيبين
عايزه اقول انى مبسوطه النهارده اوى لان اميره صحبتى فقست يووووه قصدى ولدت امبارح
وجابت 3 نونو اه تلاته نونو مع بعض ومش عايزه قر ولا حسد
بنتين وولد والحمد لله التلاته كويسين ماشاء الله عليهم
اانا لسه مش شفتهم بس اكيد التلاته هيكونو احلى من بعض
شكل العيال دى



ااجمل مافى الموضوع ان اميره دى فى سنى بس اتجوزت السنادى عشان الحب كان ولع فى الدوره خلاص
يعنى هتبقا اقد عيلها
نجى بقا للرمضان

كل سنه وانت وهى وهو وانا وكلنا طيبين وبخير وفى سعاده وعباده وايمان وتقوه
اكيد الكل مبسوط ان رمضان جه ان اول واحده بكون مبسوطه برمضان وبكل حاجه فيه
من اول الشراشيب اللى لسه مخلصه تعليق فيها الوقتى اهو
والسحور المتاخر
واخر نقطه ميا بتشربها بسرعه
والقران ونشوف مين اللى هيخلص اكتر من التانى
والسلطه اللى بعملها قبل الفطار
واتفرج ع الناس وهى مروحه متاخر ع الفطار
والصلاه بتاعت الترايح
وبرنامج عمرو خالد اللى اساسى عندى ف رمضان
المشكله عندى بقا فى حبه اللب بتاعت كل رمضان
لازام كل اول يوم فى رمضان اكل حبيه لب تقولى اشمعنا
اقول والله ماعرف بس لازام السنادى اخد بالى من حبيه الب دى
عايزين ان شاء الله نسبنا من المسلسلات والكلام الفاضى ده
ونعبد ربنا كويس محدش عارف هيحضر رمضان اللى جاى ولا لا
عايزين ناخد الرحمه والعفو والمغفره
عايزين نشد حلنا ويكون شعار كل واحد فى رمضان نفس الشعار بتاعى
وشعارى فى رمضان لن يسبقنى احد ان شاء الله الى الرحمن
اه نسيت اللى يسيب تعليق يسيب معاه فانوس كرمبو






AddThis Social Bookmark Button


الحياة تلفظ انفاسها كما قال مصعب  

الثلاثاء، 18 أغسطس، 2009


سقطت دمعة ، تعقبها دمعة ، عبرات لابد منها ..
فقد ترجل الفارس عن جواده .. مات المجاهد في الميدان
مات الجواد من الخليقة لم يعد يجدي البكاء ولا النواحة تنفع
آن للبسمة أن تموت على الشفاه ، آن للسعادة أن تقضي نحبها في القلوب
آن للورد أن يذبل
فقد مات من امتلأ وجهه بالبشاشة والفرح ..
سعى لإرضاء الله فأرضاه الله ..
ده اللى كاتبه مصعب فى اول موضوعه ومهما كتبت ومهما حاولت اكتب مش قادر اقول حاجه زياده عنه
للاسف الشديد عرفت ان والد مصعب صاحب مدونه وحى القلم اتوفى مش عارفه امتا بالظبط بس انا عرفت النهارده
بصراحه اتفجت واعدت اقنع ان مصعب بيتكلم عن حاجه تانيه مش ولده
بجد زعلت اوى وكمان كلام بجد كان صعب اوى يخلى الحجر يبكى
مش عارفه اقول للمصعب ايه غير ان يصبر ويجتسب ولده عن ربنا
مش هقادر اقوله ميزعلش لان بجد اللى عنده اب ذى ابو مصعب لازام يزعل عليه
بجد ان من كلام مصعب عنه حبيته وكان نفسى ربنا يقومه بالسلامه لكن قدر الله وماشاء فعل
لازام تشد حيلك يامصعب وربنا يصبرك ويصبر اهلك
وان شاء الله هيكون ولدك فى الفردوس العليا
ياريت كلنا نقف جمب مصعب واللى عارف رقمه يكلمه او حتى ع المدونه
لان اكيد الصدمه صعبه عليه ياريت كلنا نقرا الفتحه
ونقرا الدعاء اللى كاتبه مصعب عشان بجد طالع من القلب

AddThis Social Bookmark Button


عدموك فى بني غازي ........ ياحجازى  

الأربعاء، 12 أغسطس، 2009


امبارح وانا راحه الجامعه اخلص ورق التقديم والكلام ده فستغلت فرصه
ان صاحيه بدرى ووعديت على بتاع الجرايد قولت اشترى الجرنال اقرا فيه
وانا ف السكه
وفعلا جبت الدستور وبقلب فيه وانا فى المكروباص لقيت الصوره اللى فوق دى
تحتت عنوان ( وصول جثمان حجازي خلال ساعات بعد أن أعدمته السلطات الليبية رمياً بالرصاص )
الصراحه انا كنت ناويه اكتب عنه من يوم ماتعدام يوم الاحد اللى فات لكن بسبب انى مش كنت مشغوله شويه مش كتبت
الشخص ده من السماحيه الكبرى مركز بلقاس الدقهليه السماحيه دى بقا تبقا فيها بيت جدى اللى انا عشيت فيه مده كبيره
وانا صغيره وكمان دخلت هناك المدرسه لحد 3 ابتدائى عارفها شبر شبر
انا سمعت انا الموضوع من زمان لان حجازى ده بيتحاكم بقالى 5 سنين بالصدفه كنت هناك يوم الاحد يعنى يوم ماتعدم
وكان طبعآ البلد كلها مقلوبه لان الكل كان عنده امل ان يرجع
يومها عرفت ان حجازى اتعدم الساعه 10 الصبح تقربيآ واخر حاجه طالبها قبل مايتعدم ان يكلم مامته
ومش هعرف احكى ولا اتكلم عن حاله مامته لانى مهما اتكلمت مش هحكى المكالمه متولطش لان مامته وقعت من طولها
وهو بيقولها هيعدمونى الوقتى
حجازى اتعدم ليه بقا ؟
اقولك انا حكايه حجازى من الاول خالص
حجازى ده اتولد فى ابو ظبى لان باباه كان مسافر هناك وكانوا عايشين هناك
المستوى المادى بتاعم كويس جدآ لحد ما باباه اتوفى ورجعوا مصر
ولانهم كانوا عايشين ف مستوى كويس واكيد المستوى ده اتغير بعد وفاه ولده
لما كبر حجازى راح ليبيا عشان يشتغل زى اى حد دور فى بلده اللى مصر يعنى على
شغل وزى اى شاب ملاقش شغل
رح اشتغل مع واحد فى محل موبيلات اشتغل مده وجه يحساب الراجل مرضاش يعطى لحجازى الفلوس
راح حجازى اتخنق معاه وواخد موبيلات منه بدل فلوسه والظاهر ان الراجل ده بيعمل كده مع اى حد بيشتغل عنده
جه واحد تانى اتخنق معاه بعد حجازى بسبب الفلوس برضه وهو بيتخانق معاه راح ضربه او زقه تقربيآ راح الراجل
مات
فى التحققات بقا مين اللى معاه الموبيلات حجازى يبقا هو حجازى اللى قاتل
ورغم كبشه التناقضات وكلام الطب الشرعى الا ان كان برضه حجازى القاتل
رغم ان حجازى ده عمره ماعمل خناقه فى بلده ولا مع حد
وتلاقى كل البلد عارفه اخواته وهو لا لانه هادى وملوش ف حاجه
اعرف بقا ايه اللى عملته الحكومه او الخارجيه لحجازى غير انها وقفت تتفرج
زى مايكون فلم نازل فى موسم الصيف الستادى وبيتحضر له من 5 سنين
ايه زنبه بقا حد يقولى بالله عليكم ؟
يمكن يكون يذنبه انى من مصر والدول العربيه بدون استسناء بتعامل المصرين على انهم شحاتين ولاد شحاتين
زى مايكون الواحد رايح هنا يشحت مش يشتغل ومش انا لوحدى اللى بقول الكلام ده
وزنبه الحكومه وتنفضها للبيحصل للمصرين بره خلت ان المصرى ملوش قيمه بره بلده
ولا يمكن كان حجازى لاقى الشغل هنا كتير اوى لكن هو عشان طماع راح يشتغل بره بفلوس احسن
مفيش حد اتحرك عشان يلحقه مش مامى واحد راح يدافع عنه والخارجيه حاطه ايدها ف تلاجه
اهو واحد من ولادك يامصر شاف الزل فى السجن واتعذب بدنى ونفسى فى السجن وفى الاخر اتعدم
ايه اللى حااصل يعنى
لما مامته سفرت عشان تشوفه وراحت للخديجه القذافى بدون ادنى مساعده من الخارجيه كان ايه اللى حصل
وبعدين اهله كانوا يعملو ايه تانى البيت اتباع وكل حاجاه اتبعت والبلد جمعت فلوس وعرضوا الديه
وبرضه مفيش فايده
فى النهايه اتعدم من غير مايدافع عن نفسه ومن غير مايدافع حد عنه
وامه بتموت فى اليوم الف مره
وبقالها خمس سنين عامله ميتم لابنها
حسبى الله ونعم الوكيل
امبارح مروه الشربينى وكل اللى حصل مجرد اعتذار
النهارده حجازى ومن غير اعتذار
بكره يمكن اكون انا او انت او هى
وياعالم بانهى طريقه ؟
ربنا يرحمك ياشهيد كما اطلق عليك شباب السماحيه
اللينك بتاع الموضوع فى جريده الدستور

AddThis Social Bookmark Button


عذرآ ايها البحر انى اكرهك  

الخميس، 6 أغسطس، 2009

فى وقت غروب الشمس والشمس تختفى والامواج تدوى والظلام يعم .
كنت اجلس امام البحر التمس منه القوه وهو يفتت الصخر وارى فيه
حال قلبى .
الظلام اخفى المكان وانا قلبى اشد ظلمه فحياتى صارت
ظلام حتى نظره عينى تشع ظلام . اجلس على الشاطى وحدى
والسماء تمطر وانا اغمض عينى لعلى اشعر بالامان الذى افتقده .
اتحسس ذكرياتى التى لم انساه لحظه واتذكر ايهم وهو يقول لى انها
سيقوم برحله غدآ الى باريس . فهذا عمله انه طيار انه اجمل ما رات
عينى انه حب عمرى . فى العام الماضى يومآ كان مثل هذا اليوم كنت
على غير حالى كنت اتدى فستانى الاحمر لا الاسود كنت فى انتظار
ايهم فقد قال لى انه سياتى فى السابعه مساء اليوم انه سيحضر لى فستان
الزفاف كانت الفرحه تكاد تقفزمن عينى كنت ارتشف السعاده من كاس الحب
انه قال لى انه سياتى لى على البحر فى هذا المكان فانه كان يحب هذه الصخره
انها اعلى صخره فى هذا المكان كان دائما يجعلنى اغار من وصفه لهذه الصخره
كان يعتقد ان البحر ارق شى فى الوجود
وكالعاده خرجت فى السادسه من البيت لكى انتظره انه سياتى بفستان زفافى الذى كنت
اتمناه ولكنى رايت مالم اريد ان اره كنت انا وهو كتبنا اول حرف من اسمه وما اسمى على
هذه الصخره كعاده كل العشاق ولاننى اعشقه حد الجنون فلا اترك شى يفعله العشاق ولا افعله
ولكن لقد اختفى هذا النقش لم يعد يظهر الا بسيط .
جاءت على راسى بعض الافكار السيئه ولكنى سريعآ ماتخليت عنها وقولت عندما
ياتى ايهم سيكتبهم مره ثانيه .
جلستعلى البحر حتى ياتى ايهم ولكننى لا افعل شى سوى اننى افكر فيه وهذا ليس بجديد
كم انا مشتاقه اليه ؟
يالله ماهذا ؟الساعه التاسعه الان وايهم لم ياتى
هل نسى موعدنا ؟
لا لا لا اعتقد ايهم لم ينسى يومآ موعد بيننا
جلست اناجى البحر واساله عن السبب ولكن لم يجبنى لم اعرف لماذا لم يجبنى هذه المره
فانها المره الوحيده التى لم يتحدث فيها معى .
ما هوالحل الان ؟ .......... يالله ساعدنى .
سوف اتصل به
لكن هاتفه غير متاح معنى ذلك انه لم ياتى من باريس حتى الان
زاد القلق بقلبى وجلست اتحدث الى نفسى لماذا لم ياتى ؟
وفجاه
رن الموبيل انه من رقم المطارفكثيرآ مايحدثنى ايهم من هذا الرقم
انه هو لم ياتى على بالى ان اتصال بالمطار ماهذا كل الغباء الذى اعيش فيه ؟
قلبى خفق من الفرحه
انا: الو
هو : السلام عليكم
انا : عليكم السلام ( صوت مين ده ؟ ده مش صوت ايهم)
انا : من معايا ؟
هو : انا صديق ايهم
هو : انتى حنين ؟
انا :اه انا هى
انا :مش ده رقم المطار ؟
هو : انا اسف انا اتصلت عشان لازام ابلغك ........
انا : تبلغنى باايه ؟ ايهم فين وليه هو اللى مش بيتكلم ؟
هو :الطايره المحرك بتاعها وقف وققعت ف البحر ومحدش نجى منها
قطعته وصرخت : مش فاهمه ؟
طايره ايه اللى بتتكلم عنها وبحر ايه ؟
طايره ايهم ؟
جاوبنى وقولى لا
لا اتكد اكيد مش هيا
لا مش هيا
انا عارفه ايهم اه اتاخر شويه بس اكيد الطايره بتاعته كلها اتاخرت
طب اقولك اسال الاستعلامات
عشان خطرى ارجع فى كلمك
الا ايهم قول اى حاجه تانيه الا دى

هو: للاسف .........
انا : متقولش ان ايهم كان فيها
بقولك روح اتكد
متقولش ان ايهم مات
عشان خطرى اوعى تقولها
هو : ..................................
لم اعد اسمع منه شى احسست بان روحى قد خرجت من جسدى وانا التى مت ليس ايهم
انا قال لى انه لن يتركنى و هو لم يكذب عليا يومآ
وها انا الان اجلس امام البحر وانا ارتدى فستانى الاسود و فى يدى فستان زفافى
اناجى البحر والدموع تنزرف من عينى مثل المطر لتزيد البحر ماء
واسال البحر لماذا سرقت حبيبى ؟
لماذا تسرق منى حياتى ؟
كيف استطيع الحياه الان ؟
لماذا ؟
ولقد مرت ايام عمرى امامك .......
قلبى يكاد يختنق الحياه مظلمهالشمس تغيب ولا تشرق .
وها انا امام البحر انظر اليه فى تعجب بعد ان كان يلمس الصخرالان يفتتها
.وانا ايضآ اتعجب لحالى بعد ان كنت ارتشف السعاده من كاس الحب فانا الان ارتشف الياس من كاس العذاب
قلبى يصرج ولكن لا احد يسمعه غيرى . نعم ايتها الشمس لا تشرقى بعد اليوم
وايتها البحر القاسى كن اقوى من الصخور فالصخور لاتتفتت قوه منك ولكنها تتفتت حزنا على ايهم .
ومع اننى كعادتى اجلس بمفردى الا اننى رايت شخصآ يقترب
ماهذا الشخص ؟
من الذى يقترب منى ؟
لا لا هو لا ياربى ماهذا انه ايهم
اهو انت ؟
نعم انت هو فجريت اليه وضمنى
وقولت له انت مازلت حى ؟
قال لى انا لم اركب الطائره .
انا : لا لا ياربى الحمد لك
نعم فلتشرقى ياشمس و لتذهب ياظلام ولترقص ياقلبى الحزين لقد عاد ايهم .
انا : اثبتلى انت ايهم بجد انا مش مصدقه
اوعدنى انك عمرك ماتسبنى بعد النهارده ؟
ايهم : انا هفضل جمبك علطول
وتاتى موجه قويه وافتح عينى من هذا الحلم لاجد نفسى بمردى فى الدنياالحزينه .
اسبح فى الذكريات بمجداف الياس .
فماذا تريد منى يابحر اخذت منى حبيبى اتريد ان تاخذ حلمى ؟
فعذرآ ايها البحر انى اكرهك

17\ 7 \ 2006

AddThis Social Bookmark Button


مع خالص احتقارى  

السبت، 1 أغسطس، 2009

تحديث صغير
ياجماعه فى التعليقات بتدخل الفاظ
الالفاظ دى مش واحشه بس حلوه زياده
شويتين مش ينفع تتقال وانا مش قابلها
زى ماحصل فى البوست
وانا مسحت التعليق
اتمنى مش تكرار

::::::::::::::::::::::::::::::::::::::::::::::::::::::::::::::::::::::::::::::::::::::::::::::::

بما ان احنا لسه طالعين من موضوع كل فضفضه


واتمنى ان الموضوع ده يفضل شغال علطول

فانا قرارت افضفض او مش هفضفض انا هبعت

رساله لاكتر حد جراحنى فى الدنيا دى

وهى صحبتى يوووووووووه قصدى اللى كانت

عايز اقولها عمرى ماكنت مستنيه منك

ولا عمرى عملت فيك حاجه عشان تعملى فيا كده

عايزه اقولها انك خلتنى اشك فى نفسى عشان مش اشك فيكى

خلتنى اكدب نفسى واضحك ع نفسى عشان مصدقش اللى عملتيه فيا

رغم انى متاكده من ان انتى اللى عملتى فيا كده

خلتنى اعيش اسود يومين ف حياتى عشانك انتى
خلتنى اخاف من كل حاجه ف الدنيا لدرجه انى فضلت يومين

لوحدى ف الاوضه بتاعتى

كنت كل ماجى انام واغمض الاقى صورتك فى عنيا معرفش انام

خلتنى مش عارف افرق ان كنت صحيه ولا عايشه ف كابوس

خلتنى خايفه اوجهك رغم انك انتى اللى جرحانى

خلتنى وانا متاكده انك السبب فى الى انا فيه مش

خلتى فى يوم دماغى يتشل عن التفكير كل مافكر فى اللى انا فيه
افتكر كل يوم كنت معاكى فيه

افتكر ايامنا ف المدرسه وانتى معايا ف دسك واحد

افتكر يوم ماكنا ف الرحله سوا


افتكر لما كنا بنعد نتسابق مع بعض مين اللى

المحصف اكتر من التانى فى رمضان

افتكر الكشرى اللى عزمتنى عليه

افتكر المكرونه البشاميل اللى انت كنت بتحبها من

عشان ماما بتعملها حلو

افتكر العيش والملح اللى انت مش عملتى له حساب

اقتكر لما قابلتك بعد اللى حصل منك بيوم وانا جيت حكيت
ليكى وكنتى متاثره وزعلانه عشانى
بس انا الحمد لله الوقتى مش فاكره حاجه ليكى

عشان مش عايزه افتكرك و كمان طلعتك من حياتى
كنت متمسكه بيكى للدرجه انى كنت بدعى ربنا يحصل معجره
وتفضلى انتى صحبتى اللى انا عمرى ماشكيت فيها

بس كل حاجه كانت ضدك انتى

كان نفسى وانا بكلمك وبواجهك وانتى بتكدبى عليا

وبتقولى لا انا اعمل فيك كده الله

الله يسمحك يامى انت تتهمنى بكده



كان نفسى تفضلى تقول كده كان عندى امل



وانا بكلمك اكون ظلمكى



بس انتى لما لقيتنى عرفت كل حاجه وبالصدفه



وملقتيش فايده من انك تفضلى تمثلى عليا لان



ورقك كله اتحرق اعترفتى



لحد الوقتى كان بتمنا اكون ظلمكى

خلتنى ابكى قدام ناس عمرى ماكنت اتخيل انى ينزل دموع منى قدامهم



كنت كل سرى كنت بحبك اوى



بحب هدوك اللى انت رسامه



كنت بحب طيبتك اللى بتمثليها



احسن من اى اروع ممثل



كنت بحب الوش اللى انتى حاطه فوق وشك



بس ازاى كنتى ممثله لمده 5 سنين مش كتير شويه



ايه ده ؟



ايه الجبروت اللى انتى فيه ده



بس اقولك انتى مكلش ونب



انا اللى هبله مش طيبه لان فى



فرق بين الهبل والطيبه

واقفت جمبك ف كل حاجه


ليه تعملى فيا كده ؟

و دلوقتى خلتنى بنافق عشان صورتك مش تبقا وحشه

قدام حد عشان لو حد عرف اللى عملتيه هيبفا شكلك وحش

اوى قدامهم

اه بنافق عشان بضحك فى وشك وبكلمك وساعات

بمشى معاكى قدام اصحابنا قصدى اصحابى عشان مش

عايز انا وانتى نبقا مشتركين ف حاجه واحده

بضحك فى وشك وبكلمك وانا عارفه وانتى عارفه انى



مش عايزه اشوف وشك

اوممكن تكون مش عرفه صحيح انا نسيت انك مش بتحسى


انتى خلتنى لما اقر موضوع التسامح ع كل المدونات مش


قادر ادخل واقول ان هاسمح عشان بصراحه مش هقدار


هسمحك ومش هدخل فى اى مكان واقول ان مسامحه وانا


مش مسامحه


متفكريش انى كسرتنى يمكن اتجرحت اه لكن الوقتى احسن


من غيرك


يمكن اكون فى قلبى اسو عليكى بس انتى اللى خلتنى اكون كده


مش بكرهك بس برضه مش بحبك


هقولك ايه ربنا يسمحك هو اللى يقدر يسامح


وطبعآ مش هنسا اهديكى اغنيه

مع خالص احتقارى




انانية وغرورها ماليها وبتظهر على غير حقيقتها

قسوتها دى احن مافيها وبتتباهى بحنيتها

مش دى الانسانة اللى اتهيائلى فى يوم حبيتها

ولا دى الانسانة اللى اتمنيتها ولا اختارتها

ياخسارة كل التضحيات اللى انا ضحيتها

على واحدة مبتحبش فى حياتها غير نفسها

مش دى الانسانة اللى اتهيائلى فى يوم حبيتها

ولا دى الانسانة اللى اتمنيتها ولا اختارتها

ياخسارة كل التضحيات اللى انا ضحيتها

على واحدة مبتحبش فى حياتها غير نفسها

AddThis Social Bookmark Button


 

Design by Amanda @ Blogger Buster